Post Dam 2018, jehoi në zërat e dy koreve nga Kroacia

Hënë, 09 Prill 2018 21:30

Festivali Dam i cili për një javë ka sjellë shumë mbrëmje koncertale, u ka dhënë rastin publikut që të shijoi shumë magji tingujsh nga artistë të rinj e të njohur nga vende të ndryshme të botes. Mbrëmë në mbrëmjen e parë Post Dam 2018, Amfiteatri i Bibliotekës Universitare jehoi nga zërat e dy koreve kroate, që për më shumë se një orë sollën vepra të ndryshme që i përkisnin muzikës kroate. Përballë dy koreve ishte dirigjenti kroat Josip Delg’ Ivellio, i cili me shumë pasion luante çdo vepër që përmbante programi i tyre.

Njëri pas tjetrit, anëtarët e korit “Slavulj” nga Petrinja që ishin tridhjetë në numër zbritën shkallëve të sallës për t’u ngjitur më pas në skenë. Ky kor i përbërë nga zëra të gjeneratave të ndryshme, e nga zëra të dy gjinive hapën pjesën e parë të koncertit. Zëri i tyre ngrihej në harmoni me duart e dirigjentit Delg’ Ivellio. I mirëpritur nga publiku, ai tha se ndihet shumë i lumtur që po marrin pjesë në këtë edicion të Festivalit Dam. Ai tregoi se kori “Salvulj” është një nga koret më të vjetra në Kroaci, i themeluar në vitin 1864 dhe si i tillë ka një histori 150 vjeçare të funksionimi, pa asnjë ndërprerje as në Luftën e Parë as në Luftën e Dytë Botërore.

 

“Faleminderit Dardan Selimaj dhe shokut e kolegut tonë Memli Kelmendi, pa bashkëpunimin e këtyre mendoj se nuk do të mund të vinim sonte këtu” u shpreh para hapjes, dirigjenti kroat Josip Delg’ Ivellio.

Veprat e kompozitorit italian Domenico Bartolucci ishin ato që e hapën mbrëmjen, për të vazhduar me veprat e kompozitorit kroat Emil Cosseto. Në veprën e e Giovanni Ramundo, u interpretua edhe me tingujt e pianios përcjellë nga Vedra Mihel. Kur në skenë u ngjitën instrumentistët Zvonimir Milicevic, Mislav Magerl, Jasemina Augestic ata në këtë koncert koral, sollën muzikë të folkorit të tyre, duke u përcjellë kështu më ritmin e duartrokitjeve të publikut.

 

Pas tyre, në skenën e Amfiteatrit të Bibliotekës Universitare erdhi një gjeneratë e re e pjesëtarëve nga Kori Akademik i Burrave të Fakultetit të Inxhinierisë Elektrike. Ky kor i cilit është që dy vite aktiv nën dirigjimin e dirigjentit kroat Josip Delg’ Ivellio solli para publikut rreth dhjetë vepra. Në veprën e fundit atyre iu bashkëngjit solistja Maja Ostojic, që së bashku me ta rrëmbyen duartrokitjet e publikut.

Në bashkëpunim me Korin Siparantum, këto dy kore kishin dërguar muzikën e tyre korale edhe në dy qytete të tjera të Kosovës. Peja dhe Klina kishin qenë nikoqire të këtyre dy koreve kroate. Maja Ostojic, e cila solli interpretoi dy këngë si soliste tha se për të është hera e parë që vjen në Kosovë ndërsa ndihet shumë e lumtur që është këtu dhe përgjatë këtyre ditëve ka interpretuar edhe në qytetet e tjera të Kosovës.

“Këndova dy këngë si soliste dhe fillimisht isha e shqetësuar nga reagimi i publikut por mandej u ndjeva shumë rehat dhe mendoj që ata e mirëpritën këtë”, u shpreh për KultPlus, solistja Ostojic.

 

Ines Kosturin që duket se është më e re në moshë se anëtarët e tjerë të korit “Slavulj” nga Petrinja, tha se sonte janë munduar që të përpilojnë një program të llojllojshëm.

“Jemi munduar që të përpilojmë një program të llojllojshëm, jemi munduar të sjellim muzikë sakrale, muzikë folklorike kroate duke u bazuar në mënyrën tonë tradicionale të këndimit kurse kori tjetër këndoi disa nga veprat e njohura kroate”, tregoi Kosturini për KultPlus, ajo tutje shtoi se është shumë e rëndësishme për dy shtete si Kosova dhe Kroacia të kenë festivale të tilla që bashkojnë vende të ndryshme nga Evropa në një vend për ta mësuar një kulturë të re.

 

“Muzika është mënyra më e mirë për ta shprehur këtë sepse nuk kërkon ta dish gjuhën, është një gjuhë universale në të gjitha shoqëritë, e në të gjitha vendet. Në koncerte si këto gjuha e humb funksionin e saj”, shtoi Kosturini.

Në mesin e të pranishmëve që kishin ardhur për ta ndjekur nga afër këtë koncert, ishte dhe kompozitori Zeqirja Ballata. Ai për KultPlus u shpreh se është mirë që ka komunikime të tilla me këto kore nga Kroacia, të cilat mund të shërbejnë edhe si nxitje për punën në Kosovë.

 

“Natyrisht këto dy ansamble nuk janë ansamble profesionale në kuptimin e ngushtë të fjalës por në vendet e zhvilluara ku bën pjesë edhe Kroacia, institucionet që nuk janë profesionale muzikore kanë aktivitete të ndryshme. Si të tillë arrijnë të përgatisin këngë qofshin më të vjetra që janë më të afërta, më të lehta, më të kapshme, qofshin këngë të përpunuara e popullore”, tha ai, ku tutje u shpreh se është shumë mirë një vizitë e tyre këtu sepse do të ishte një nxitje që edhe ndër ne diku të ndërtohet një institucion me kushte të mira që të formojnë kore ansamble, qofshin kore apo grupe më të vogla.

Lini komentin tuaj!

Fyerjet dhe përdorimi i fjalëve banale, do të pasoj me fshirjen e komentit tuaj.

Lajmet e fundit

Moti ndryshon nga java e ardhshme, temperaturat në rënie…

Aktualitet

Moti ndryshon nga java e ardhshme, temperaturat në rënie…

Moti freskohet duke filluar nga java e ardhshme. Sipas Meteoalb, gjatë fundjavës, moti mbetet me kthjellime dhe vranësira kalimtare në pjesën më të madhe të vendit; më të dukshme vranësirat...

Lejuan kalimin e paligjshëm të 7 shtetasve turq, ndalohen dy punonjës policie

Aktualitet

Lejuan kalimin e paligjshëm të 7 shtetasve turq, ndalohen dy punonjës policie

Dy punonjës policie dhe një shtetas turk janë ndaluar nga policia për korrupsion aktiv. Të ndaluar kanë mbetur Gazmir Dega punonjës policie në Komisariatin nr 1 në Tiranë dhe një kontrollore...

Po ndodh, RENEA dhe FNSH aksion në Tiranë dhe rrethe

Aktualitet

Po ndodh, RENEA dhe FNSH aksion në Tiranë dhe rrethe

Forcat e Ndërhyrjes së Shpejtë në bashkëpunim me Prokurorinë e Krimeve të Rënda kanë goditur një grup gjobëvënësish. Aksioni po zhvillohet mbrëmjen e sotme në Tiranë dhe disa rrethe, ndërsa...