May: Duhet bërë më tepër për t'iu kundërvënë agjencisë ruse të spiunazhit GRU

Premte, 07 September 2018 07:22

Kryeministrja Theresa May thotë se Britania dhe aleatët e saj duhet të bëjnë më shumë për t’iu kundërvënë agjencisë ruse të spiunazhit të njohur si GRU, që sipas saj përbën një kërcënim të madh për Perëndimin. Paralajmërimi i kryeministres May erdhi pas identifikimit nga hetuesit të dy agjentëve të agjencisë GRU të dyshuar si përgjegjës për helmimin me lëndë nervore të ish agjentit të dyfishtë Sergei Skripal dhe vajzës së tij Julia në mars, në qytetin britanik Salisbury. Siç njofton nga Londra korrespondenti Henry Ridgwell, nuk ka gjasa që autorët të përballen me drejtësinë:

Kamerat e vëzhgimit kanë kapur në video arritjen e dy shtetasve rusë në aeroportin Gatwick të Londrës më 2 mars. Pasaportat e tyre kanë emrat Alexander Petrov dhe Ruslan Boshirov, por policia beson se emrat janë të rremë.

Kamerat e sigurisë ndjekin udhëtimin e tyre në një hotel në lindje të Londrës - dhe pastaj në qytetin Salisbury, ku policia thotë se ata kanë aplikuar agjentin nervor Novichok në derën kryesore të shtëpisë së ish agjentit të dyfishtë Sergei Skripal.

Ata janë parë këtu, pranë vendbanimit të tij të dielën më 4 mars, ditën kur Skripali dhe vajza e tij Julia u gjetën gjysmë të vetëdijshëm në qendër të qytetit. Dy të dyshuarit u larguan nga aeroporti Heathrow po atë mbrëmje për në Rusi.

Duke njoftuar parlamentin të mërkurën, kryeministrja Theresa May tha se shërbimet britanike të sigurisë i kishin identifikuar burrat si agjentë të agjencisë ruse të spiunazhit GRU.

"Veprimet e agjencisë GRU janë një kërcënim për të gjithë aleatët tanë dhe për të gjithë qytetarët tanë. Në bazë të asaj që kemi mësuar në hetimin në Salisbury dhe atë që dimë në lidhje me këtë organizatë më gjerë, duhet të shtojmë tani përpjekjet tona kolektive në mënyrë specifike kundër GRU-së ".

GRU-ja e Rusisë mendohet të ketë luajtur një rol kyç në aneksimin e Krimesë në vitin 2014; hakerimin e emaileve të Komitetit Kombëtar Demokratik në Shtetet të Bashkuara; dhe një përpjekje për grusht shteti në Malin e Zi.

"Ajo specializohet në këto operacione të rrezikut të lartë," thotë eksperti Andrew Foxall.

Sergei dhe Yulia Skripal u shëruan plotësisht, së bashku me një oficer policie, i cili u ekspozua ndaj agjentit nervor nga viktimat.

Për të dyshuarit është lëshuar një autorizim evropian arresti. Por kushtetuta ruse ndalon ekstradimin e qytetarëve të saj. Në vend të kësaj, Britania dhe aleatët e saj duhet të marrin masa shtesë krahas atyre që u miratuan në kohën e helmimit, thotë analisti Foxall.

"Gjithsej gati 150 oficerë të padeklaruar të inteligjencës ruse u dëbuan nga vendet perëndimore. Sigurisht që mund të bëhet më shumë. Kryeministrja vetë ka sugjeruar që ne mund të shtyjmë për sanksione shtesë nga Bashkimin Evropian. Në Shtetet e Bashkuara, sanksionet shtesë janë tashmë në fuqi".

Rusia thotë se emrat dhe fotografitë e dhëna "nuk nënkuptojnë asgjë për Moskën". Banorët e kryeqytetit u dukën mbështetës ndaj qëndrimit të qeverisë së tyre.

"Rusët nuk kanë nevojë të bëjnë një gjë të tillë. Për çfarë qëllimi? Ky është një provokim. Nuk ka prova, nuk ka dëshmi, apo logjikë."

"Britania dhe Theresa May e kanë organizuar vetë këtë, sepse nuk u pëlqen Putini".

Policia thotë se helmi Novichok u kontrabandua në Britani dhe u administrua duke përdorur këtë shishe të rreme parfumi.

Një çift që gjeti shishen të hedhur dhe e mori në shtëpi, u shtrua në spital në qershor - një prej tyre, Dawn Sturgess, vdiq dhjetë ditë më vonë.

Lini komentin tuaj!

Fyerjet dhe përdorimi i fjalëve banale, do të pasoj me fshirjen e komentit tuaj.

Lajmet e fundit

Rishfaqet pas 6 vitesh piktura e vjedhur e Picasso

Kuriozitete

Rishfaqet pas 6 vitesh piktura e vjedhur e Picasso

Një pikturë që besohet të jetë “Tête d’Arlequin” nga Pablo Picasso e cila është vjedhur në 2012 nga Muzeu Kunsthal i Roterdamit është shfaqur në Rumani. Hajdutët morën shtatë piktura, me...

Papa fton në meshë të varfrit

Aktualitet

Papa fton në meshë të varfrit

Padrejtësia është rrënja e pandreqshme e varfërisë”, tha Papa Françesku në meshën që shënoi Ditën e Kishës Katolike për të Varfrit. Ati i Shenjtë ftoi për shërbesën në Bazilikën e...

‘Po vdesin njerëz’/ Bllokohen rrugët në këtë zonë të Shqipërisë

Aktualitet

‘Po vdesin njerëz’/ Bllokohen rrugët në këtë zonë të Shqipërisë

Moti i keq në Dardhë të Korçës po rrezikon jetën e banorëve  dhe të turistëve që kanë shkuar për të parë bukuritë e zonës. Edhe pse prej dy ditësh është dhënë...

Sondazh

Nothing found!

Sondazh

Nothing found!