Ish agjenti i CIA-s arrestohet  për zotërim të paligjshëm të informacioneve të klasifikuara

Një ish-oficer i CIA-s u arrestua nën akuzat për zotërim në mënyrë të paligjshme të informacioneve që lidhen me sigurinë kombëtare, sipas një njoftimi të Departamentit amerikan të Drejtësisë. 53 vjeçari Jerry Chun Shing Lee, i njohur si Zhen Cheng Li, u arrestua të hënën në mbrëmje ndërsa mbrriti në aeroportin ndërkombëtar John F. Kennedy të Nju Jorkut. Lee, që ka fituar shtetësinë amerikane me natyralizim dhe që aktualisht banon në Hong Kong, nisi të punonte si agjent i CIA-s në vitin 1994. Ai bëri një paraqitje fillestare të martën në një gjykatë federale në Nju Jork, por me akuzat do të përballet në Virxhinia, atje ku ndodhet godina e CIA-s. Ai akuzohet për zotërim të paligjshëm të informacioneve që lidhen me mbrojtjen kombëtare dhe nëse shpallet fajtor, pritet të dënohet deri me 10 vjet heqje lirie. Ai do të mbahet në gjendje arresti në pritje të gjykimit. Departamenti i Drejtësisë tha se në vitin 2012 agjentët e FBI-së kontrolluan dhomat e tij në disa hotele ku kishte kishte qëndruar gjatë udhëtimeve të tij në Virxhinia dhe Havai dhe gjetën dy blloqe shënimesh me dorë që mbanin informacione të klasifikuara. Aty përfshiheshin “numra telefoni të pronave dhe emra të punonjësve të fshehtë të CIA-s, shënime operative, vendndodhja e takimeve operative si dhe objekteve të fshehta”. Sipas një dëshmie nga një agjent i FBI-së, Lee ishte intervistuar nga Buroja Federale e Hetimit pesë herë në vitin 2013 dhe në asnjë nga rastet nuk kishte bërë të ditur se zotëronte këto blloqe shënimesh. Sipas Departamentit të Drejtësisë, gjatë asaj periudhe ai ishte takuar edhe me ish-kolegë të tij të CIA-s por nuk i kishte kthyer materialet qeverisë.

Dita – Steve Bannon refuzon të përgjigjet për çështjen ruse/Steve Bannon, ish-strategu i presidentit amerikan, Donald Trump, ka refuzuar t’i bindet një thirrjeje, e cila kërkon nga ai të përgjigjet në pyetjet e një komiteti të Kongresit, që është duke hetuar ndërhyrjen e supozuar ruse në zgjedhjet presidenciale të vitit 2016 në Shtetet e Bashkuara. Pasi Bannon ka refuzuar të përgjigjet në pyetje, pas disa orësh takimi privat me Komitetin e Inteligjencës të Dhomës së Përfaqësuesve, ligjvënësit, kanë thënë se udhëheqësi i komitetit, Devin Nunes, ka autorizuar një thirrje gjatë takimit për të detyruar Bannon që të përgjigjet. Edhe pas asaj, Bannon ka refuzuar të përgjigjet, pasi avokati i tij është konsultuar me Shtëpinë e Bardhë dhe i është thënë të refuzojë të përgjigjet në pyetjet për periudhën transitore, pasi Trump është zgjedhur president në nëntor të vitit 2016, apo rreth kohës së Bannonit në Shtëpinë e Bardhë, është thënë bazuar në deklaratat e anëtarit të këtij komiteti, demokratit, Adam Schiff. “Me siguri ky ka qenë urdhër i Shtëpisë së Bardhë”, ka thënë Schiff. Zëdhënësja e Bannonit nuk është përgjigjur në kërkesat për të komentuar një gjë të tillë. Ndaras, The New York Times, ka raportuar se Bannon është thirrur javën e kaluar nga këshilltari special, Robert Mueller, për të dëshmuar para Jurisë së Madhe, e cila po ashtu po heton lidhjet e supozuara në mes të Rusisë dhe fushatës presidenciale të Trumpit më 2016. Është raportuar se kjo ka qenë hera e parë që Mueller ka përdorur një thirrje të tillë kundër një anëtari të rrethit të ngushtë të Trumpit. Në Shtëpinë e Bardhë, sekretarja, Sarah Huckabee Sanders, ka thënë se “askush” nuk i ka thënë Bannonit të mos përgjigjet në Komitetin e Dhomës së Përfaqësuesve. “Sa i përket kërkesave kongresionale drejt Shtëpisë së Bardhë, Kongresi duhet të konsultohet me Shtëpinë e Bardhë për të marrë material konfidencial. Kjo është pjesë e një procesi gjyqësor, i cili funksionon me dekada”, ka thënë Sanders. Një zyrtar i Shtëpisë së Bardhë, i ka thënë agjencisë së lajmeve, AP, se presidenti nuk ka kërkuar ushtrimin e ndonjë privilegji për Bannon, hap i cili mund ta kishte ndaluar atë për t‘iu përgjigjur disa pyetjeve. Bannon ka qenë nga ndihmësit më të ngushtë të Trumpit, duke udhëhequr agjendën e fushatës zgjedhore “Amerika e para”, ndërsa më pas ishte emëruar këshilltar kryesor i presidentit, në muajt e parë kur Trump mori detyrën. Mirëpo palët janë përballur me mosmarrëveshje, pas komenteve të Bannonit që i ka bërë tek libri më i ri i Micheal Wolff “Zjarr dhe Tërbim: Brenda Shtëpisë së Bardhë të Trumpit”. Në këtë libër, Bannon citohet të ketë përshkruar “tradhtar” dhe “jopatriotik”, një takim mes disa rusëve dhe djalit të presidentit Trump, Donald Trump Jr., ish-udhëheqësit të fushatës së tij, Paul Manafort dhe dhëndrrit të tij, Jared Kushner. Presidenti ka kundërshtuar Bannon pas publikimit të librit duke e vënë në pikëpyetje çështjen nëse ai e “ka humbur mendjen”. Bannon ishte shkarkuar nga pozita e tij në Shtëpinë e Bardhë në muajin gusht të vitit të kaluar, ndonëse ai ka vazhduar të flasë me presidentin dhe ka promovuar agjendën e tij, deri në nisjen e mosmarrëveshjeve gjatë këtij viti. Gjatë takimit të tij me Komitetin e Inteligjencës në Dhomën e Përfaqësuesve, Schiff ka thënë se Bannon ka refuzuar të deklarohet jo vetëm për Shtëpinë e Bardhë, mirëpo edhe në bisedat që ai ka pasur me Trumpin pasi e ka lënë administratën, “të cilat mund të jenë zhvilluar për qëllime të presidentit Trump që t’i kërkojë këshilla për gjithçka”.

 

 

Lini një përgjigje

Adresa juaj e emailit nuk do të bëhet publike. Fushat e detyrueshme janë shënjuar me *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>